Mayornan
mester cuminsa cu prevencion di droga ora e mucha ta hoben, como cu e ora e
mucha por absorbe hopi mas informacion y influencia positivo. Mas chikito un
mucha ta, mas nos por logra serca dje.
Nos muchanan di awe no ta capaz ainda pa enfrenta y bringa e peligernan ei. Ta nos mester juda nan y guianan con pa enfrenta y bringa e peligernan ei. Ta deber di cada un pa hasi esaki y ta hopi necesario pa cuminsa awor y no mañan.
Pa juda nos jiunan, ta importante pa mayornan awendia evalua nan mes y analisa nan mes como Mayor, pa wak si nos ta cumpliendo cu cierto exigencianan basico pa ser Mayor.
Na prome lugar
nos mester ta « E ehempel »
di nos jiunan. Esaki ta encera hasi locual nos ta bisa. Hopi biaha ta
socede cu nos ta bisa nos jiunan kiko nan mester bisa y nos mes ta hasi tur lo
contrario.
1)
Siña cambia conocimento den accion corecto. Aplica
locual nos sa cu ta bon pa e mucha.
2) Actua semper den bienestar di e mucha, si e kier of no. No kere cu complaciendo nos jiunan, nos ta evita di hasi nan sinti tristo. Si abo sa cu e locual e kier no ta na su bienestar NO HASIE.
3) Actua apropiadamente y sin miedo cu bo lo afecta e mucha. Papia cu bo jiunan na un manera respetuoso tocante cosnan di bida manera sexualidad, embarazo, sex, aids, droga, depressividad, suicidio etc…
FORTIFICA
DIARIAMENTE BOSO CONTACTO CU OTRO. ESAKI
TA SANO.
UN
BON CONTACTO CU BO JIU TA HASIBO SINTI BON CU BO MES.
Un di e
problemanan mas grandi awendia, ta cu nos como Mayor NO ta pone nos mes den
sapato di nos jiunan. Nos no ta poniendo nos mes den nan mundo. Nos ta verwacht
mucho hopi cu nan ta sigui biba den nos mundo.
Pa nos sa kiko
e ken realmente nos jiunan ta, pa nos sa y conoce nan inquietud- y
inseguridadnan, nos mester COMPARTI mucho mas cu nan. No laga pa mañan
locual bo por hasi awe. Logra un
bon combersacion diario cu nos jiunan por juda nos compronde nan mihor y
consequentemente juda nan mihor tambe.
Den e mundo di
awe nan unda nos jiunan ta wordo azota pa alcohol, droga, embarazo hubenil,
peer-pressure etc…nos mester hinca mucho mas di nos banda pa contra-aresta e
problematica aki.
Percura pa ora
bo jiu wordo ofreci su prome droga e tuma e decision corecto.
Pa muchanan siña tuma decisionnan corecto den futuro, ta
importante pa nos prepara nan debidamente con e proceso aki ta hinca den otro.
Nos tur kier
pa nos jiunan tuma decisionnan corecto ora nan bira grandi. Tumamento di
decisionnan corecto ta algo cu nos por siña nos jiunan. Ta importante pa tuma
tempo, sinta cu nos jiunan un rato y analisa con ta tuma decisionnan y con ta hasi escogencianan corecto
cu ta na nan bienestar.
Awendia nos
jiunan ta wordo bombardea cu tur sorto di influencianan, p.e. por medio di
propaganda. E mensahenan aki tin un solo meta : cumpra, cumpra y cumpra. Hopi
di e mensahenan aki no ta berdad. Nan
ta mas bien mensahenan cu ta bruha e mente di e mucha. Tambe tin avalancha di
propagandanan cu ta promociona uso di alcohol y sigaria abiertamente, asociando
e cosnan aki cu sexualidad, exito y beyesa. Tur e mensahenan aki tin influencia
riba e mucha.
Pa contra-aresta
e tentacionnan aki, nos como Mayor mester saca tempo, sinta cu e muchanan y
splicanan cu e cosnan aki hopi
biaha ta maniobranan cu comerciantenan ta hasi pa bende nan producto. Ta wordo
hasi tur lo posible pa influencia e mente di e hoben pasobra nan sa cu ta aki ta
caminda nan por logra influencia hopi mas lihe y bende productonan facilmente.
Ta importante
tambe pa puntra e mucha kiko su opinion ta tocante tur e cosnan aki. Asina nos
por habri un discusion abierto riba e mucha su pensamentonan. E ora bo
por haña sa tambe si e mucha por wordo influencia facilmente of no.
Si un mucha ta
influenciabel na chikito, esaki ta sosede ora e ta grandi tambe. E peliger ta e
ora cu constantemente e ta laga otronan tuma decision pe y influencia su mente.
Ora un mucha
tuma un decision cu no ta corecto, no paga mucho atencion riba e fout cu ela
comete.
Ta mucho mas
importante pa nos analysa
conhuntamente cu e mucha ta « DI CON » ela tuma tal decision.
Asina nos por siña e mucha pa siña tuma decisionnan corecto den futuro y siña
di su foutnan. Discuti su erornan cu ne y splica e mucha e « pakiko »
di tur cos.