Background

Ø      Prologo

Na hopi ocacion sa tende e number FADA.

Pero no ta tur hende sa exactamente ki papel FADA tin riba e tereno di prevencion di uso y abuso di alcohol ariba nos isla. Semper por surgi un of mas situacion caminda hende tin mester di un conseho of cualkier informacion riba e tereno aki. Pero no ta semper nos sa unda exacto por busca esaki. Pesei FADA a disidi di bini cu e website informativo aki. Riba e website aki comunidad en general por hanja e informacion necesario di e fundacion p.e. con e ta traha, kiko su metanan ta y tambe unda e oficina ta situa. Tambe comunidad por hanja informacion tocante e droganan legal y ilegal.

Corda cu FADA semper ta cla pa duna cualkier conseho of informacion riba posible duda y pregunta.

M I H O R    P R E V E N I    C U    C U R A

Ø   Pakiko a funda FADA?

FADA a wordo funda ariba 16 di oktober 1984. E abreviacion ta nifica Fundacion Anti Droga Aruba. Uso di droga ta un problema cu ta amenaza e isla di Aruba. Un grupo di mayor hopi preocupa cu e situacion peligroso aki a tuma e iniciativa di cuminsa cu un fundacion pa preveni uso y abuso di droga riba nos isla. E mayornan aki a hanja cu tin mester di un fundacion cu por informa y concientisa e pueblo di Aruba y sigur e hobennan encuanto e problemanan cu uso di droga ta trese cune. E fundacion aki mester sinja nan tambe strategianan necesario pa tuma decisionnan den forma positive p’asina evita cu nan ta cai den droga.

Ø        Categorianan di prevencion

Tin 3 categoria di prevencion:

Prevencion primario ta destina pa hende cu nunca no a usa alcohol of droga anteriormente.

Prevencion secundario ta destina pa persona cu ta usando sea alcohol o droga y cu ainda no a perde control riba nan uso.

Prevencion terciario ta pa persona cu a perde control riba e uso di nan. Den e categoria aki nos ta papia di rehabilitacion. FADA ta concentra su mes solamente riba e categorianan primario y secundario. FADA no ta traha ariba e tereno di rehabilitacion, pero ariba tereno di prevencion.

Ø        Kiko FADA kier logra?

Banda di duna infromacion tocante droga, FADA tambe kier pa e comunidad hanja e instrumentonan necesario pa por tuma decisionnan positivo. P’esei e fundacion ta traha cu e siguiente metanan.

Ø        Metanan general

Preveni uso di droga dor di desaroya e habilidadnan necesario den e persona, pa e por tuma decisionan sana na bienestar di su mes salud y bienestar personal.

Ø        Metanan concreto

1. Duna e mucha/hoben e instrumentonan necesario, manera conocemento, experiencia, actitud pa por tuma decisionnan sano.

2. Duna mayornan y educadornan e sosten pa nan por juda nan jiu of alumno pa bira un adulto liber di droga.

3. Informa y concientisa e adultonan y comunidad en general tocante e consecuencianan di uso/abuso di droga y alcohol.

4. DRUGFREE WORKPLACES pa promove lugarnan di trabou liber di droga dor di duna informacion tocante uso/abuso di droga/alcohol na trahadornan.

5. Programa PARENTS TO PARENTS/PADRES A PADRES, pa juda adultonan educa mucha di un forma efectivo, pa asina preveni uso di droga bou di nos muchanan.

6. Siman di Cinta Cora/Red Ribbon Week; un siman den oktober, den cual tin hopi actividad manera charlanan di oradornan di exterior, bendemento di cinta cora y tambe actividad social, manera “caminata cu luna jen”.

Tambe FADA ta coopera cu otro instancianan concerni den e problematica di droga.

Ø         Situacion financiero

FADA no ta un  instancia lucrativo, pues e no ta traha pa hasi ganashi. Pa financiamento di su actividadnan anual, FADA ta depende gran parti di e donacionnan, specialmente di e sector comercial. Desde anja 1992 gobierno di Aruba ta subsidia di e gastonan administrativo y pago di salario de e funcionarionan.

Ø         Con pa contact FADA?

FADA actualmente ta situa den Dakota Shopping Paradise na Fergusonstraat # 51, Dakota.

Nos telefonnan ta : 5832999 y 5839610

Nos fax ta: 58364501

Nos e-mail ta: fada123@setarnet.aw

BACK TO MAIN PAGE