Aislamento
social y spiritual
E aislamento social y spiritual cu e persona ta sinti ta causa cu e ta haya periodonan di hopi soledad y depresion. Su conducta inmoral ta haci cu e ta odia su mes y e ta pensa cu lo ta miho si e no ta existi.
Esaki ta e momento cu e pashent ta yega na e fondo emocional asina horrible cu e otro pashentnan ta menciona durante e combersacionnan. Si na e momento aki e pashent no a haya e debido ayudo pa su enfermedad, esaki por resulta fatal.
E deterioro fisico, den ocasionan prison, enfermedadnan, e ambiente delectivo den cual e ta involucra su mes of suicidio, ta su ultimo camindanan pa morto. E estadisticanan ta duna di conoce cu alcoholismo y adiccion na droga ta kita por lo menos 15 anja di bida di e personan cu ta use.
Violencia ta caba cu hopi di e personanan, ya sea den enfrentamento cu polis, den prison, etc. , pero tambe e malesa mes ta caba cu e persona. E sufrimento, tanto mental como fisico cu e malesa ta trese cune por ta causa di morto.
Den resumen e malesa di adiccion tin e siguiente caracteristicanan:
E ta un malesa primario…un malesa cu su propio causa, sintoma y prognosis; e no ta un condicion psiquiatrico.
E ta un malesa compulsivo…e individuo ta perde e control di su consume ora e ta bebe e prome dosis di drinks. Esaki ta debi na e alteracionnan cu ta produci den e sistema neuronal.
E ta un malesa obsesivo…e individuo ta haya un idea fiho (e droga) den su mente. E ta pensa constantemente con pa mantene su habito.
E ta un malesa cronico…e no por wordo cura, pero si trata. E persona nunca ta hanja e control pa ingeri alcohol na un manera controla.
E ta un malesa progresivo…den mayoria di caso, e perdida di control riba e droga dor di e alteracionnan neurotransmisor ta aumenta lentamente. E persona malo ta pasa dor di varios etapa.
E ta un malesa delusorio…e persona ta biba den un sistema di autoengaño completo, leu for di realidad y den un negacion absoluto di e berdadero problema.
E ta un malesa cu hopi biaha ta resulta FATAL. E adicto cu ta usa droga pa sinti euforia y sinti su mes bon, sinembargo, cu tempo e euforia y placer aki ta bira cada biaha menos y ora cu e regresa na normalidad, e ta sinti su mes malo y pa e motibo aki e ta usa e droga atrobe.
Den e ultimo fase di e uso di droga e persona ta hincá den un circulo vicioso, den cual e deterioro fisico ta requeri pa e bandona e uso, pero e dolornan emocional ta asina fuerte cu e mestersigi usa e droga pa no sinti esakinan, aunque esaki kiermen cu e ta bai empeora fisicamente.
Hopi biaha un persona no ta descubri e adiccion te ora cu ta laat caba, esaki ta pa e motibo cu e sintomanan y señalnan di e prome etapanan ta crea confusion y ta warda te ora cu e malesa ta den su etapanan avanza pa determina cu seguridad cu ta trata di un adicto.
Con pa
determina si bo ta adicto na un droga
Un di e preguntanan cu un persona cu ta den e problema aki ta hasi cu mas frecuencia ta : Mi ta adicto?
Pa yuda e persona den su ansia, un equipo di experto a formula diferente pregunta cu por determina si e persona cu kier haya sa si e ta adicto, mester di ayudo.
Siguientemente nos lo bai trese algun di e preguntanan pa boso hanja sa cua nan ta. E preguntanan aki ta wordo haci na e persona cu ta yama pa ayudo pa asina por determina si e ta adicto of no. Si bo contesta "SI" na mayoria di e preguntanan bo por considera bo mes un adicto.